दत्तात्रेय शंकर सोमण

दत्तात्रेय शंकर सोमण (८ मे, इ.स. १९३० - ९ ऑक्टोबर, इ.स. २०११; मुंबई, महाराष्ट्र) हे महाराष्ट्र पोलिसातले अधिकारी होते. सोमण इ.स. १९८५ ते इ.स. १९८७ या कालखंडात मुंबई पोलीसदलाचे आयुक्त होते, तर इ.स. १९८७ ते इ.स. १९८८ या कालखंडात महाराष्ट्र पोलीसदलाचे पोलीस महासंचालक होते. मुंबई पोलीसदलाच्या महासंचालकपदी असताना मुंबईतील माफिया टोळीचा डॉन वरदराजन मुदलियार याचे माफिया साम्राज्य मोडून काढण्यात पोलिसांना यश आले.

दत्तात्रेय शंकर सोमण
जन्म	८ मे, इ.स. १९३०
मृत्यू	९ ऑक्टोबर, इ.स. २०११ मुंबई, महाराष्ट्र
निवासस्थान	मुंबई
राष्ट्रीयत्व	मराठी, भारतीय
वांशिकत्व	मराठी
नागरिकत्व	भारतीय
पेशा	पोलीस
मूळ गाव	सोलापूर, महाराष्ट्र
पदवी हुद्दा	महाराष्ट्र पोलीस महासंचालक (इ.स. १९८७-८८) मुंबई पोलीस आयुक्त (इ.स. १९८५-८७)

जीवन

सोमणांचे शिक्षण महाराष्ट्रात सोलापुरात झाले. भारतीय पोलीस सेवेच्या इ.स. १९५३ च्या तुकडीतून ते पोलीससेवेत दाखल झाले.

इ.स. १९७०-८० च्या काळात मुंबईतील माफिया साम्राज्यावर वरदराजन टोळीची पकड होती. त्याला पुढे सोमण आणि वाय.सी. पवार जोडीने नामशेष केले. सोमण पुढे पोलीस महासंचालक झाले.

पोलीसदलातून निवृत्त झाल्यानंतर त्यांनी आर्थिक गुन्हेगारी रोखण्यासाठी काय करता येईल याविषयी 'सेबी'ला सल्लागाराच्या भूमिकेत मदत केली. यामुळे 'सेबी' बळकट झाली आणि गुंतवणूकदारांना दिलासा देण्यात यशस्वी झाली. सोमण यांचे प्रशासकीय कौशल्य लक्षात घेऊन त्यांना मुंबई महापालिकेचे अतिरिक्त आयुक्त करण्यात आले. महापालिकेत त्यांच्या रूपाने पोलीस अधिकाऱ्याची नियुक्ती होणे, ही घटना बहुचर्चित बनली. पालिकेच्या कारभारातही त्यांनी मोलाचे योगदान दिले.

संकीर्ण

सोमणांनी आपला पोलीस नावाचे पुस्तक लिहिले आहे.