सौरभ चौधरी

सौरभ चौधरी (११ मे २००२) हा एक भारतीय नेमबाज आहे. तो एर पिस्तूल प्रकारात नेमबाजी करतो. तो उत्तर प्रदेशातील मीरत जिल्ह्यातील कलिना गावचा रहिवासी आहे. त्याचे वडील जगमोहनसिंग शेतकरी आहेत आणि आई ब्रजेशदेवी गृहिणी आहे.

सौरभ चौधरी

वैयक्तिक माहिती
पूर्ण नाव	सौरभ चौधरी
राष्ट्रीयत्व	भारतीय
जन्मदिनांक	११ मे, २००२ (2002-05-11)
उंची	६ फूट
वजन	७५ किग्रॅ
खेळ
देश	भारत
खेळ	नेमबाजी
खेळांतर्गत प्रकार	एर पिस्तूल
क्लब	वीर शामल रायफल क्लब
पदके पदक माहिती भारत या देशासाठी खेळतांंना नेमबाजी आशियाई स्पर्धा सुवर्ण २०१८ आशियाई खेळ १० मीटर एर पिस्तूल आयएसएसएफ ज्युनिअर विश्वचषक स्पर्धा सुवर्ण आयएसएसएफ ज्युनिअर विश्वचषक स्पर्धा जून २०१८,जर्मनी १० मीटर एर पिस्तूल आयएसएसएफ ज्युनिअर विश्वचषक स्पर्धा सुवर्ण आयएसएसएफ ज्युनिअर विश्वचषक स्पर्धा, सप्टेंबर २०१८, दक्षिण कोरिया १० मीटर एर पिस्तूल रौप्य आयएसएसएफ ज्युनिअर विश्वचषक स्पर्धा, सप्टेंबर २०१८, दक्षिण कोरिया १० मीटर एर पिस्तूल सांघिक सुवर्ण युवा ऑलिम्पिक क्रीडा स्पर्धा, ऑक्टोबर २०१८, ब्युनॉस आयर्स १० मीटर एर पिस्तूल सुवर्ण आयएसएसएफ विश्वचषक स्पर्धा, फेब्रुवारी २०१९, नवी दिल्ली १० मीटर एर पिस्तूल सुवर्ण आयएसएसएफ विश्वचषक स्पर्धा, फेब्रुवारी २०१९, नवी दिल्ली १० मीटर एर पिस्तूल मिश्र दुहेरी

सुरुवातीचे दिवस

अमित शेओरोन यांच्या बागपत जवळील बेनोली येथील वीर शाहमल रायफल अकादमीमध्ये २०१५ मध्ये सौरभने नेमबाजीचे प्रशिक्षण घेण्यास सुरुवात केली. सौरभने काही स्पर्धांमध्ये जिंकून या खेळातील चमक दाखवल्यावर त्याच्या वडिलांनी लोकांकडून पैसे गोळा करून त्याला पिस्तूल घेऊन दिले. त्याचे माध्यमिक शिक्षण बागपत येथील आदर्श विद्यापीठ, इंटर कॉलेज येथून झाले. सध्या तो तोलाहन इंटर कॉलेजमध्ये शिकत आहे.

कारकीर्द

२०१८ आशियाई क्रीडा स्पर्धा

२०१८ साली इंडोनेशियामधील जकार्ता, पालेमबँग येथे झालेल्या आपल्या पदार्पणाच्या आशियाई स्पर्धेत सौरभने वयाच्या अवघ्या सोळाव्या वर्षी १० मीटर एर पिस्तूल प्रकारात सुवर्णपदक मिळवले. या स्पर्धेत २४०.७ गुण मिळवून त्याने आशियाई स्पर्धेत विक्रम नोंदवला.

आशियाई युवा ऑलिम्पिक २०१७

डिसेंबर २०१७ मध्ये आशियाई युवा ऑलिम्पिकच्या पात्रता स्पर्धेत सौरभने ज्युनिअर विश्वविक्रम प्रस्थापित करत सुवर्णपदक मिळवले.

आयएसएसएफ ज्युनिअर विश्वचषक स्पर्धा २०१८

जून २०१८ मध्ये जर्मनीत झालेल्या आयएसएसएफ ( International School Sport Federation) ज्युनिअर विश्वचषक स्पर्धेत सौरभने नवीन ज्युनिअर विश्वविक्रम प्रस्थापित करत सुवर्णपदक मिळवले.

आयएसएसएफ विश्वचषक स्पर्धा २०१८

दक्षिण कोरियातील चांग्वेन येथे सप्टेंबर २०१८ मध्ये झालेल्या आयएसएसएफ स्पर्धेत ज्युनिअर १० मीटर एर रायफल प्रकारात सौरभने सुवर्णपदक पटकावले.२४५.५ गुण मिळवून त्याने स्वतःचाच विश्वविक्रम मोडून नवा विश्वविक्रम प्रस्थापित केला. याच स्पर्धेत सौरभ चौधरी,अर्जुनसिंग चीमा आणि अनमोल यांनी सांघिक रौप्य पदक जिंकले.

युवा ऑलिम्पिक क्रीडा स्पर्धा २०१८

ऑक्टोबर २०१८ मध्ये ब्युनॉस आयर्स येथे झालेल्या युवा ऑलिम्पिक क्रीडा स्पर्धेत सौरभने १० मीटर एर पिस्तूल प्रकारात सुवर्णपदक मिळवले.

आयएसएसएफ विश्वचषक स्पर्धा २०१९

• भारतातील नवी दिल्ली येथील डॉ.कर्णी सिंग शूटिंग रेंजवर फेब्रुवारी २०१९ मध्ये झालेल्या आयएसएसएफ स्पर्धेत १० मीटर एर पिस्तूल प्रकारात सौरभने वयाच्या सोळाव्या वर्षी वरिष्ठ गटातील सुवर्णपदक पटकावले.२४५.० गुण मिळवून त्याने नवा विश्वविक्रम प्रस्थापित केला. तसेच भारतासाठी टोकियोमध्ये २०२० साली होणाऱ्या ऑलिम्पिक स्पर्धेसाठी या स्पर्धा प्रकारात कोटा मिळवला.
• याच स्पर्धेत सौरभने मनू भाकरच्या साथीने मिश्र दुहेरी गटात १० मीटर एर पिस्तूल प्रकारात सुवर्ण पदक जिंकले.