धनंजय मुंडे

धनंजय पंडितराव मुंडे (जन्म १५ जुलै १९७५) हे एक मराठी राजकारणी व सध्या महाराष्ट्र सरकारमध्ये सामाजिक न्याय व विशेष सहाय्य विभागाचे कॅबिनेट मंत्री म्हणून कार्यरत आहेत. यापूर्वी ते महाराष्ट्र विधान परिषदेत विरोधी पक्षनेते होते.

धनंजय मुंडे
मंत्री सामाजिक न्याय आणि विशेष सहाय्य
विद्यमान
पदग्रहण ३० डिसेंबर २०१९
मागील	सुरेश खाडे
मतदारसंघ	परळी, महाराष्ट्र विधानसभा
जन्म	१५ जुलै, १९७५ (1975-07-15) परळी
राष्ट्रीयत्व	भारतीय
राजकीय पक्ष	• भारतीय जनता पक्ष (१९९४ ते २००९)  • राष्ट्रवादी काँग्रेस (२००९ पासून पुढे)
वडील	पंडितराव मुंडे
पत्नी	राजश्री मुंडे
नाते	• गोपीनाथ मुंडे (काका)  • पंकजा मुंडे-पालवे (बहीण)  • प्रीतम मुंडे-खाडे (बहीण)
अपत्ये	४
शिक्षण	बॅचलर ऑफ सोशल लॉ
गुरुकुल	सिम्बॉयसीस कॉलेज पुणे
व्यवसाय	राजकारणी, वकील, सामाजिक कार्यकर्ता
धर्म	हिंदू
संकेतस्थळ	www.dhananjaymunde.org

वैयक्तिक जीवन आणि शिक्षण

मुंडे यांचा जन्म १५ जुलै १९७५ला नाथ्रा, परळी वैजनाथ, बीड येथे वंजारी कुटुंबात झाला. त्यांच्या कुटुंबात त्यांची आई रुख्मिणी मुंडे, पत्नी राजश्री मुंडे आणि मुलगी आदिश्री मुंडे आहेत. मुंडे यांचे प्राथमिक शिक्षण न्यू इंग्लिश स्कूल परळी वैजनाथ येथे झाले. तर महाविद्यालयीन शिक्षण सिम्बॉयसीस कॉलेज पुणे येथून झाले आहे. त्यांनी बॅचलर ऑफ सोशल लॉ मधून आपली पदवी संपादन केली आहे.

बलात्काराचे आरोप

२०२१ मध्ये त्यांच्यावर रेणू शर्मा नावाच्या महिलेकडून बलात्काराचे आरोप करण्यात आले होते, नंतर ते आरोप मागे घेण्यात आले. रेणू शर्मा यांची बहिण करुणा शर्मा यांच्यासोबत आपले परस्पर सहमतीने विवाहबाह्य संबंध होते, करुणा शर्मा पासून त्यांना दोन मुले असल्याचे मुंडे यांनी मान्य केले आहे.

राजकारण

१९९५ च्या विधानसभा निवडणुकीपासून ते राजकारणात आले. सुरुवातीला ते भारतीय जनता पक्षामध्ये भारतीय जनता पक्षाचे विद्यार्थी आघाडी प्रमुख होते. त्यानंतर भारतीय जनता युवा मोर्चाचे उपाध्यक्ष, प्रदेश सरचिटणीस व प्रदेशाध्यक्ष या पदांवर अनेक वर्ष त्यांनी काम केले.

पुरस्कार

1. दैनिक लोकमतच्या वतीने विधिमंडळातील उत्कृष्ट अभ्यासू वक्ता पुरस्कार
2. दैनिक लोकमतच्या वतीने पॉवरफुल राजकारणी पुरस्कार