लपाछपी (चित्रपट)

लपाछपी हा २०१७ सालचा, विशाल फुरिया दिग्दर्शित आणि जितेंद्र पाटील निर्मित मराठी भयपट आहे. पूजा सावंत या चित्रपटात मुख्य भूमिकेत आहे. तसेच उषा नाईक, विक्रम गायकवाड आणि अनिल गवस यांनी देखील महत्त्वाच्या भूमिका साकारल्या आहेत. हा चित्रपट १४ जुलै २०१७ला प्रकाशित करण्यात आला होता.

लपाछपी
भाषा	मराठी
प्रदर्शित	इ.स. २०१७

कथानक

तुषार (विक्रम गायकवाड) याला पैसे परत करण्यासाठी गुंड मारहाण करतात. अधिक त्रासापासून  वाचण्यासाठी तो त्याची   गरोदर पत्नी नेहाला (पूजा सावंत) घेऊन त्याचा ड्रायव्हर भाऊरावच्या गावी जातो. गावात तुषार आणि नेहा या दोघांची ऊसाच्या मळ्यावरच्या घरात व्यवस्था केली जाते. भाऊराव आणि त्याची पत्नी तुळसाबाई (उषा नाईक) तुषार आणि नेहाची काळजी घेतात.  दोन दिवस झाल्यावर शहरातील परिस्थिती पहायला तुषार एका दिवसासाठी शहरात जातो. या एका दिवसात नेहाला तुळसाबाईच्या विचित्र स्वभावाचा अनुभव येतो. तसेच तिची तीन लहान मुलांबरोबर भेट होते. तुषार परत आल्यावर नेहा त्याचे मन वळवून त्याच्याबरोबर शहरात जायला निघते. पण भाऊराव आणि तुळसाबाई तुषारला आणि नेहाला मारहाण करून पकडतात आणि मांत्रिकाकडून त्यांच्यावर जादू करवतात. भाऊराव आणि तुळसाबाईच्या घरावर त्यांनी खून केलेल्या भावजयेच्या भूताचं सावट असतं. भावजयेचं भूत आठव्या महिन्यातील स्त्रिला झपाटून आठव्या महिन्यात तिचा गर्भपात करत असतं. भूताचे सावट नष्ट करण्या साठी त्यांच्या घरात गरोदर बाईने आठव्या महिन्यात तीन दिवस एकटे राहणे आवश्यक असते. यासाठीच भाऊरावाने तुषार आणि नेहाला मळ्यावर आणलेलं असतं. नेहा कशीबशी तीन दिवस घरात राहते आणि या तीन दिवसात तिला भयानक अनुभव येतात. या अनुभवातून तिला भाऊराव, तुळसाबाई आणि प्रतापराव यांनी भावजयेवर केलेल्या अत्याचाराची जाणीव तर होतेच पण तिला घरातील अमानुष प्रथा पण कळते. 

तीन दिवस झाल्यावर तुषार , तुळसाबाई आणि भाऊराव परत येतात. नेहा त्यांना तिला त्यांची पापकर्मे कळल्याचं सांगते आणि तुषारला तूच प्रतापराव असल्याचं सांगून तिथून पळते. प्रतापराव, भाऊराव आणि तुळसाबाई तिला मारायला तिच्या मागे धावतात. पण भाऊरावाची पहिली पत्नी मध्ये येऊन भाऊरावावर वार करते आणि नेहाला पळून जायला मदत करते.

कलाकार

• पूजा सावंत - नेहाच्या भूमिकेत
• उषा नाईक - तुळसाबाईच्या भूमिकेत
• विक्रम गायकवाड - तुषार उर्फ प्रतापरावच्या भूमिकेत
• अनिल गवस - भाऊरावच्या भूमिकेत
• अपर्णा अंबवणे - कावेरीच्या भूमिकेत
• धनश्री खंडकर - लक्ष्मीच्या भूमिकेत
• हृदयनाथ राणे

संगीत

चित्रपटाच्या साउंडट्रॅकमध्ये फक्त २ गाणी होती आणि जुलै २०१७ मध्ये झी म्युझिकने रिलीज केली होती. संगीत उत्कर्ष धोटेकर, टोनी देवरी बासुमतरी, श्रेयस पुराणिक आणि रंजन पटनायक यांनी तयार केले होते. एक खेल लपाछपी चा (लोरी), स्वेश्री शसी यांनी लिहिलेली, मूळतः नंदिनी बोरकर यांनी गायली होती, परंतु नंतर रेखा भारद्वाज यांनी रेकॉर्ड केली. वैशाली सामंत यांनी दिल खुलास हे दुसरे गाणे गायले.

प्रतिसाद

लपाछपीने खालील पुरस्कार जिंकले:

ब्रुकलिन चित्रपट महोत्सव 2016 - स्पिरिट अवॉर्ड

स्पॉटलाइट हॉरर फिल्म अवॉर्ड्स 2016 - गोल्ड अवॉर्ड विजेता

माद्रिद आंतरराष्ट्रीय चित्रपट महोत्सव 2016 - अधिकृत निवड

• विजेता - सर्वोत्कृष्ट नवीन दिग्दर्शक
• नामांकन - सर्वोत्कृष्ट अभिनेत्री, सर्वोत्कृष्ट सहाय्यक अभिनेत्री, सर्वोत्कृष्ट मूळ स्कोर, सर्वोत्कृष्ट संपादन

हॉरर हॉटेल फिल्म फेस्टिव्हल, ओहायो

• अधिकृत निवड, 4था स्थान विजेता

पुनर्निर्मित

छोरी (हिंदी भाषेतील रिमेक, विशाल फुरिया दिग्दर्शित)