वीणा चिटको

वीणा चिटको (१४ ऑगस्ट, इ.स. १९३५ - १९ सप्टेंबर, इ.स. २०१५) या मास्तर कृष्णराव यांच्या कन्या असून स्वतः लेखिका, कवयित्री, गीतकार आणि संगीत दिग्‍दर्शक होत्या.

नाट्यसृष्टीत अनेक वर्षे परिपक्व चालीने भारदस्त स्वररचना करणाऱ्या संगीतकलानिधि मास्टर कृष्णराव (उर्फ मास्तर कृष्णराव) फुलंब्रीकर यांची मुलगी म्हणून वीणा चिटको यांचे प्रभात स्टुडिओ व नंतर राजकमल स्टुडिओमध्ये येणे-जाणे होते. प्रभात स्टुडिओतल्या कोरस विभागात वीणा चिटको यांना लहानपणी गायला मिळत असे. मास्टर कृष्णराव यांनी संगीतबद्ध केलेल्या बुद्ध वंदना मधील कोरसमध्येदेखील त्या गायल्या आहेत.

केवळ भारतातच नव्हे; तर परदेशात जाऊनही त्यांनी संगीताचे कार्यक्रम केले होते. त्यांनी सतार वादनाचेसुद्धा प्रशिक्षण घेतले होते. त्या मराठी भावगीतांच्या पहिल्या स्त्री-संगीतकार होत्या. एचएमव्हीच्या त्या भावगीत प्रकारातील पहिल्या स्त्री-संगीतकार होत्या म्हणून एचएमव्हीने त्यांचा जाहीर सन्मान केला होता.

वीणा चिटको यांचे पूर्वाश्रमीचे नाव प्रभा फुलंब्रीकर असे होते. त्यांचे मॅट्रिकपर्यंतचे शालेय शिक्षण पुणे येथील भावे स्कुलमध्ये झाले तर पुणे भारत गायन समाज येथून त्यांनी 'संगीत विशारद' ही हिंदुस्थानी शास्त्रीय गायन विभागातील पदवी संपादन केली.

वीणा चिटको यांचे अनेक मासिके व वृत्तपत्रे यांमध्ये ललित लेख व मास्टर कृष्णराव यांच्यावरील स्मृति लेख प्रसिद्ध झालेले आहेत.

वीणा चिटको यांनी रचलेली गीते

• अंबरातल्या निळ्या घनांची (संगीत वीणा चिटको; गायक रामदास कामत)
• मन माझे भुलले (संगीत वीणा चिटको; गायक रामदास कामत)
• सखी सांज उगवली (संगीत वीणा चिटको; गायक रामदास कामत)
• सांग प्रिये सांग प्रिये (संगीत वीणा चिटको; गायक रामदास कामत; राग पूरिया धनाश्री)

वीणा चिटको यांनी संगीतबद्ध केलेली गाणी

• अंबरातल्या निळ्या घनांची (कवयित्री वीणा चिटको; गायक रामदास कामत)
• पूर्वेच्या देवा तुझे सूर्यदेव नाव (कवी गंगाधर महांबरे; गायक रामदास कामत; राग भूप)
• मन माझे भुलले (कवयित्री वीणा चिटको; गायक रामदास कामत)
• मयुरा रे फुलवित ये रे पिसारा
• वाटे भल्या पहाटे यावे (कवी गंगाधर महांबरे; गायक रामदास कामत)
• वायुसंगे येइ श्रावणा (कवी गंगाधर महांबरे; गायक रामदास कामत)
• सखी सांज उगवली (कवयित्री वीणा चिटको; गायक रामदास कामत)
• सांग प्रिये सांग प्रिये (कवयित्री वीणा चिटको; गायक रामदास कामत)