दोन स्पेशल

नाट्य-चित्रपट अभिनेते जितेंद्र जोशी आणि निर्माते संतोष कणेकर यांची निर्मिती असलेल्या 'दोन स्पेशल' या नाटकात पत्रकारिता, तीत झालेली स्थित्यंतरे आणि सामान्यजनांच्या जगण्याशी असलेला त्यांचा अन्योन्य संबंध चितारण्यात आला आहे. बिकट परिस्थितीत लोकशाहीचा चौथा स्तंभ आपल्या प्रामाणिक व तत्त्वनिष्ठ पत्रकारितेद्वारे जपू पाहणाऱ्या एका पत्रकाराच्या संघर्षांची (व्यक्तिगत आणि व्यावसायिकही!) विलक्षण उत्कंठावर्धक कहाणी 'दोन स्पेशल'मध्ये अलवारपणे उलगडत जाते.

ह.मो. मराठे यांच्या 'न्यूज स्टोरी' या मूळ कथेवर आधारित या नाटकात एका पत्रकाराची तत्त्वनिष्ठा आणि एका विचित्र जीवघेण्या परिस्थितीत त्याच्या पुढय़ात येऊन उभ्या राहिलेल्या त्याच्या एकेकाळच्या प्रेयसीचा जगण्याचा संघर्ष यांतले थरारक द्वंद्व मांडण्यात आले आहे. यानिमित्ताने माणसाचे जगणे महत्त्वाचे की पत्रकारितेतील तत्त्वनिष्ठा, असा अत्यंत अवघड प्रश्न 'दोन स्पेशल'मध्ये ऐरणीवर आणला गेला आहे.

नेपथ्यकार प्रदीप मुळ्ये यांनी उभारलेले १९८९ सालातील पुण्यामधील एका वृत्तपत्राच्या कार्यालयाचे अप्रतिम वास्तवदर्शी नेपथ्य आणि त्यांनीच प्रकाशयोजनेतून जिवंत केलेले तत्कालीन काळाचे संदर्भ हेही या नाटकाचे एक महत्त्वाचे वैशिष्टय़ आहे. आणि या सगळ्यापलीकडे जात जितेंद्र जोशी, गिरीजा ओक- गोडबोले आणि रोहित हळदीपूर यांच्या अभिनयाने 'दोन स्पेशल' सर्वार्थाने संस्मरणीय केले आहे.