लहान पाणकावळा (शास्त्रीय नाव: Phalacrocorax niger, फॅलाक्रॉकरॅक्स नायजेर ; इंग्लिश: Little Cormorant, लिटल कॉरमरंट) हा पाणथळी जागेत आढळणारा, कर्मोराद्य कुळातील पक्षी आहे. हे पक्षी रंगाने काळे व पाणथळी जागेत आढळणारे असल्याने पाणकावळा या नावाने ओळखले जातात. पूर्व आशियातील चीनपासून आग्नेय आशियादक्षिण आशियापर्यंतच्या भूप्रदेशांत नदी, तलाव, खाडी, समुद्राजवळील झाडींमध्ये हे पक्षी थव्याने आढळतात. मासे हे यांचे मुख्य खाद्य होत. पाण्यात सूर मारून हे आपले भक्ष्य पकडतात. सूर मारण्यात व पोहोण्यात हे पक्षी अतिशय तरबेज आहेत. परंतु बदकांसारखी खास पिसे नसल्याने त्यांची पिसे चांगलीच ओली होतात. सूर मारल्यानंतर पंख वाळवताना हे पक्षी बऱ्याचदा नदीकाठच्या दगडांवर पंख पसरून वाळवताना दिसतात.

लहान पाणकावळा
शास्त्रीय नाव फॅलाक्रॉकरॅक्स नायजेर
(Phalacrocorax niger)
कुळ कर्मोराद्य
(Phalacrocoracidae)
अन्य भाषांतील नावे
इंग्लिश लिटल कॉरमरंट
(Little Cormorant)
संस्कृत पानीयकाकिका
हिंदी छोटा पनकौवा, जोग्राबी